“Ballkan”, goditet grupi i trafikut të drogës; 7 të arrestuar në Shqipëri

Policia e Shtetit ka njoftuar paraditen e sotme finalizimin e operacionit antidrogë të koduar “Ballkan”, i ekzekutuar në disa vende të rajonit dhe në bashkëpunim mes policive të tyre.

Në një deklaratë për mediat, nëndrejtori i përgjithshëm i policisë, Ardian Çipa ka bërë me dije se operacioni është kryer pas 15 muaj hetime në Greqi, Kosovë, Maqedoni dhe Serbi.

“Në datat 6 dhe 7 korrik në Shqipëri janë ekzekutuar urdhër-arrestet për 7 persona. Në pranga kanë rënë shtetasit: Jurgen Molla, Shyqyri Kotorri, Anesti Koromani, Nuredin Hazeraj, Lulzim Qorri, Denis Sinametaj dhe Blerim Ukimeraj. Ndërkohë, dy persona të tjerë janë shpallur në kërkim”, ka deklaruar Çipa.

Numri dy i Policisë së Shtetit ka nënvizuar se, grupi kriminal ka trafikuar droga të llojeve të ndryshme dhe ka saktësuar se gjatë aksionit janë sekuestruar 26 kg heroinë, rreth 2 kg kokainë dhe 183 kg hashash, si dhe një shumë parash në euro e armë zjarri.