Banka e Shqipërisë, në gjurmët e modelit të bankave qendrore botërore

Viti 2017 përkon me 25-vjetorin e krijimit të sistemit bankar dynivelor në Shqipëri dhe krijimin e Bankës së Shqipërisë si një bankë qendrore moderne.

Gjatë këtyre viteve, institucioni Bankës së Shqipërisë është rritur dhe transformuar pa ndërprerje.

Sot 25 vite më pas Banka e Shqipërisë ka arritur të ndërtojë një institucion të rëndësishëm vendimmarrës të njëjtë me shumicën e bankave të tjera qendrore kudo në botë.

Në faqen zyrtare të saj, BSH-ja, ka publikuar një material filmik mbi aktivitetet kryesore të Bankës së Shqipërisë për vitin 2017.

Sistemi bankar e mbyll vitin 2017 me performancë financiare në rritje. Sipas të dhënave të Shoqatës Shqiptare të Bankave, në 10-mujorin e këtij viti fitimi i industrisë bankare në vend preku shifrën e 18.9 miliardë lekëve ose 140 milionë eurove.

Kjo shifër përfaqëson një rezultat në rritje me 127% krahasuar me të njëjtën periudhë të një viti më parë.

Faktori me ndikimin kryesor në këtë rezultat ka qenë ulja e shpenzimeve për fondin rezervë të kredive me probleme. Shpenzimet për provigjione për 9-mujorin e këtij viti kishin vlerën e 1.6 miliardë lekëve, në rënie me afro 90% krahasuar me të njëjtën periudhë të një viti më parë.

Kjo tregon qartë se përmirësimi i cilësisë së kredisë ka pasur një ndikim të rëndësishëm në performancën financiare të bankave. Sektori bankar vazhdon gjithashtu të ruajë nivele të larta të kapitalizimit.

Treguesi i mjaftueshmërisë së kapitalit është më i rëndësishmi në këndvështrimin e soliditetit financiar të bankave dhe mat raportin e kapitalit rregullator ndaj aktiveve me rrezik.

Në fund të muajit shtator, ky tregues ishte 16.4%, nga 12% që është pragu minimal i kërkuar nga Autoriteti Mbikëqyrës.