Basha: Investime në fasada, njerëz në mjerim
Kryetari i Partisë Demokratike, Lulzim Basha, deklaroi nga çadra e protestës, në një bashkëbisedim me qytetarë nga Qarku i Lezhës, se “është zgjedhja e Edi Ramës që të investojë në fasada dhe të lërë fshatrat në mjerim”.
“Ndihma ekonomike për njerëzit në nevojë është tallje dhe poshtërim. Si ka mundësi që shteti shqiptar, që sot ka taksa më të larta se para 4 vitesh, që mbledh më shumë para’ nga faturat e energjisë e ujit se para 4 vitesh, nuk arrin dot të paguajë një ndihmë ekonomike dinjitoze? Janë hequr nga skema e ndihmës ekonomike edhe 40 mijë familje. Kjo është e mundur kur blen palma autostradash 500-600 euro. Ky është realiteti kriminal i një kaste që ka humbur çdo lidhje dhe ndjenjë ndaj popullit të vet”, tha Basha.
Kreu i PD-së shtoi: “Është zgjedhja e Edi Ramës që të investojë në fasada dhe të lërë fshatrat në mjerim. Vetëm në 4 muajt e parë janë shpenzuar 380 milionë euro për shpenzime administrive: makina, zyra, dieta, bileta avioni dhe luks qeveritar. Paratë që mblidhen nga shqiptarët nuk kthehen në investime të vërteta në ekonomi”.
“Mungesa e përgjegjshmërisë para qytetarëve ka në themel aleancën e Edi Ramës me krimin e organizuar”, nënvizoi Basha.
