Basha uron Presidentin e ri të Komisionit Europian, Jean Claude Juncker

Kryetari I Partisë Demokratike, Lulzim Basha, shprehu sot urimet më të përzemërta për Presidentin e ri të Komisionit Europian, Jean Claude Juncker.

“Europa sot ka nevojë për përvojën e madhe politike të një europianisti të palëkundur, të një politikani konsensual dhe që konsensusin ka në themel të vendimmarrjes së tij politike, si Jean Claude Juncker”, theksoi Basha.

Sipas kreut të PD-së, “platforma e Juncker është e qartë, është ajo që i duhet çdo europiani sot, një ekonomi sociale tregu në të cilën përfshihet edhe një paketë investimesh me një vlerë prej 300 miliard euro, për të nxitur zhvillimin, punësimin dhe konkurrencën”.

“Jam veçanërisht i gëzuar që Presidenti i ri i Komisionit Europian është një mbështetës i fuqishëm i integrimit europian të Shqipërisë. Jam i bindur se me Jean Claude Juncker Europa do të jetë më e njëzëshme dhe më e hapur për demokracitë e reja që aspirojnë ti bashkohen familjes europiane”, tha Basha.

Sot, vijoi Basha, “është një ditë e veçantë edhe për Europën. Për herë të parë në historinë e BE-së, Parlamenti Europian ka zgjedhur – dhe jo thjesht miratuar – Presidentin e Komisionit Europian me propozim të Këshillit Europian çka e bën BE dhe më demokratik” .