Çështja ‘Doshi’- Monika Kryemadhi dëshmoi në Prokurorinë e Krimeve të Rënda

Deputetja e Lëvizjes Socialiste për Integrim, Monika Kryemadhi është paraqitur mbrëmjen e djeshme në Prokurorinë e Krimeve të Renda për të dhënë dëshminë e saj në lidhje me cështjen “Doshi”.

Pas daljes nga Prokuroria  Monika Kryemadhi, në një prononcim për mediat shprehu gatishmërinë për të bashkëpunuar me organet e drejtësisë.

Znj. Kryemadhi u shpreh se ka dhënë në Prokurori të gjithë shpjegimet rreth ngjarjes, ndërsa shprehu gatishmërinë për t’u përballur në organet e drejtësisë me Tom Doshin dhe me të gjithë shokët e tij.

“Meqenëse malësori Tom dhe malësori Sali Berisha merren me gra dhe me fëmijë, isha në Prokurori për të dhënë gjithë shpjegimet e mia rreth ngjarjes dhe jam gati të ballafaqohem në Prokurori me Tomën dhe shokët e tij për çdo problem që ai ka. Dhe dua t’ju siguroj dhe juve, që meqenëse përmenden gjithë familjarët, gjyshja ime ka vdekur, në qoftë se pretendon Toma që mund ta shpëtojë në rastin e tij”, tha deputetja e LSI-së Monika Kryemadhi.