BE-ja, Serbisë: Mos e shfrytëzo situatën

Bashkimi Evropian (BE), ka paralajmëruar vendet kandidate për anëtarësim në këtë organizatë që të mos shfrytëzojnë embargon që Rusia ka vendosur për produktet ushqimore të Unionit, për të përfituar vetë.

Në një deklaratë të miratuar nga ministrat e Jashtëm të Bashkimit Evropian, u kërkohet vendeve kandidate, siç është edhe Serbia, që të mos përfitojnë nga kjo situatë për të zgjeruar tregtinë e tyre.

Ky paralajmërim i drejtohet specifikisht Serbisë, i vetmi vend në Ballkan që ka një marrëveshje të tregtisë së lirë me Rusinë.

Zyrtarët serbë nuk e kanë fshehur dëshirën e tyre për të rritur eksportet në Rusi, pas vendimit të Kremlinit për vendosjen e embargos.

Serbia i rezistoi presionit të Perëndimit për të vendosur sanksione ndaj Rusisë, duke mbajtur një qëndrim neutral për krizën në Ukrainë.