Berisha: Dialogu me Beogradin të ndërpritet menjëherë

Anëtari i kryesisë së Aleancës për Ardhmërinë e Kosovës (AAK), Anton Berisha, ka theksuar se dialogu në mes Kosovës dhe Serbisë është shndërruar në një cirkus në të cilin përfiton Serbia.

Berisha në Facebook ka shkruar “se deklarata e Vuçiqit dhe Gjuriqit tregojnë se i ashtuquajturi dialog ndërmjet Beogradit e Prishtinës, është shndërruar në një cirkus në të cilën Serbia përfiton, dhe se zyrtarët e saj përçmojnë deri në tallje zyrtarët e qeverisë së Kosovës”.

“Kjo gjendje e dëmshme dhe përulëse për Kosovën, duhet të ndërpritet menjëherë. Kosova duhet të ndërpresë dialogun me Serbinë, një Qeveri e re e Kosovës duhet të fillojë procesin e ri, por paraprakisht të ketë marrëveshje me Brukselin që bisedat të normohen në të gjitha aspektet”, ka shkruar Berisha.

Ai më tutje ka theksuar se autoriteti i shtetit të Kosovës dhe zyrtarëve të saj shtetëror i degraduar duhet të kthehet në nivelin që i takon shtetit dhe popullit të Kosovës.