Berisha i vetëm në garë, përfundojnë zgjedhjet për kryetarin e PD-së

Të shtunën në orën 19:00 u mbyll procesi i zgjedhjeve për kryetarin e Partisë Demokratike një orë më vonë nga sa ishte parashikuar. Votimi nisi në orën 08:00 të mëngjesit, me hapjen e 87 qendrave të votimit në të gjitha degët e Partisë Demokratike në vend.

Në këtë proces, në garë ishte vetëm kryetari aktual Sali Berisha, i cili e ka cilësuar votimin e 23 majit si një “referendum” për drejtimin e partisë. Fillimisht, përballë tij u përmendën si aspirantë për kandidim edhe Evi Kokalari, Ervin Salianji, Alesia Balliu, Mereme Sela dhe Vladimir Mulaj, por ata nuk u pranuan në garë, duke bërë që Berisha të mbetet i vetëm përballë anëtarësisë.

Procesi u zhvillua në të gjitha degët e partisë ndërsa Partia Demokratike ka paralajmëruar mbledhjen e Kuvendit Kombëtar, ku pritet të miratohen ndryshimet në statut.