Berlini: Moska të respektojë unitetin e Ukrainës pas zgjedhjeve

Ministri gjerman i Punëve të Jashtme, Frank Walter Steinmeier, i kërkoi sot autoriteteve ruse që të mbajnë premtimin për të respektuar unitetin e Ukrainës, një ditë pas fitores së zgjedhjeve nga rebelët prorusë në lindje të vendit.

“Ne do të gjykojmë Rusinë dhe presidentin Vladimir Putin sipas deklaratës së tyre, që uniteti i Ukrainës nuk do të vihet në dyshim”, deklaroi Steinmeier, në një reagim të parë ndaj zgjedhjeve në lindje të Ukrainës.

Shefi gjerman i diplomacisë vlerësoi se “ky i ashtuquajtur votim, i gjykuar si i jashtligjshëm nga BE-ja, bie ndesh me fjalët dhe shpirtin e marrëveshjes së Minskut”, të arritur më 5 shtator mes Kievit dhe rebelëve, me mbështetjen e komunitetit ndërkombëtar dhe të Moskës.

Dje në mbrëmje Federica Mogherini, shefja e re e diplomacisë evropiane, kishte theksuar se marrëveshjet e Minskut janë mjetet ligjore dhe legjitime për të përcaktuar autoritetet lokale në lindje të Ukrainës të kontrolluar nga separatistët prorusë.

Nga ana tjetër, Moska u shpreh se respekton rezultatet e zgjedhjeve dhe vlerësoi, në ndryshim nga Perëndimorët, se këto votime përbëjnë një pikë të rëndësishme të marrëveshjeve të Minskut dhe mundësojnë legjitimimin e autoriteteve separatiste.

Pa shumë surpriza, votimet e organizuara në këto territore, gati gjysma e rajonit të donetskut dhe një pjesë e vogël e rajonit të Luganskut, konflirmoi në funksionet  tyre krerët e rebelëve që erdhën gjatë verës në krye të separatistëve.

BE-ja e cilësoi këtë iniciativë si një pengesë të re ndaj procesit të brishtë të paqes, pas një konflikti që zgjat prej gjashtë muajsh dhe ka bërë më shumë se 4 000 të vdekur.