Bisedimet e Brukselit, Mustafa: Progres para diskutimeve në nivel kryeministrash
Kryeministri i Kosovës, Isa Mustafa ka vlerësuar se është arritur progres gjatë bisedimeve të nivelit teknik në Bruksel, lidhur me energjinë, lirimin e lëvizjen mbi urën e Ibrit dhe parimet për themelimin e Asociacionit të Komunave.
Para takimit në nivel kryeministrash, përmes një postimi në Facebook, kryeministri Mustafa ka bërë të ditur se “marrëveshjet që mund të arrihen janë në interes të sovranitetit të vendit dhe të integrimit europiane dhe euroatlantik”.
“Çështja e energjisë, e Asociacionit të Komunave, kodit telefonik dhe lëvizjes në urën e Ibrit janë diskutuar gjatë, me vite të tëra. Ky fakt tregon se janë trajtuar në mënyrë të hollësishme mundësitë, si dhe korniza kushtetuese e ligjore, dhe nuk është vepruar e nuk do të veprohet në arritjen me çdo kusht të asnjë marrëveshjeje”.
Mustafa ka shtuar se “nuk kanë shkuar në Bruksel për të bërë fushatë, por për zgjidhjen e problemeve që, – siç ka shkruar ai, – 15 vite me radhë po e ngulfasin Kosovën dhe po na paralizojnë të merremi me çështjet tona jetike”.
“Paralizimi i pavarësisë dhe funksionalitetit të shtetit të Kosovës iu përshtatet vetëm atyre që ende jetojnë me mendësinë e së kaluarës, por besoj se ka ardhur koha të hiqet dorë nga ajo mendësi”, ka shkruar kryeministri në Facebook.
