Blater dorëhiqet nga FIFA (VIDEO)
Kreu i FIFA-s Sep Blater ka dhënë dorëheqjen pak minuta më parë, vetëm 2 ditë pasi u rizgjodh për një mandat të pestë në krye të institucionit më të rëndësishëm në botë për futbollin.
Dorëheqja vjen pas skandalit korruptiv që ka përfshirë FIFA-n, i cili u shoqërua me arrestimin e 7 zyrtarëve të lartë të qeverisë botërore të futbollit.
Lajmin e njoftoi sot vetë Blateri në një konferencë për mediat në Zyrih, ndërsa bëri të ditur se do të organizojë një konferencë të jashtëzakonshme për zgjedhjen e kreut të ri.
“Mandati im duket që nuk ka mbështetjen e të gjithëve. Jam shumë i lidhur me FIFA-n dhe interesat e saj janë të rëndësishme për mua dhe kjo është arsyeja që unë kam marrë këtë vendim. Do doja të falënderoja të gjithë ata që më kanë mbështetur gjithmonë në mënyrë konstruktive dhe besnike si president i FIFA-s”, tha Blater para mediave.
Deri në zgjedhjen e presidentit të ri FIFA do të vazhdojë të drejtohet nga zvicerani. Blater njoftoi gjithashtu një nisjen e një programi të rëndësishëm për reformimin e organizatës.
Pritet që zgjedhjet e reja të mbahen pas katër muajve.
