Bllokimi i lejeve të ndërtimit, Gjykata Kushtetuese rrëzon qeverinë

Gjykata Kushtetuese ka vendosur të rrëzojë vendimin e Këshillit Kombëtar të Territorit, të kryesuar nga kryeministri Edi Rama për bllokimin e lejeve të ndërtimit.

Në një njoftim të këtij institucioni, thuhet se pas mbledhjes së gjyqtarëve është vendosur shfuqizimi i vendimit të KKT-së, i marrë më 22 gusht të vitit të kaluar.

“Gjykata Kushtetuese, pasi shqyrtoi dhe analizoi vendimet e palës kërkuese, prapësimet e subjekteve të interesuara, me vendimin e datës 15.01.2015, bazuar në nenet 131 dhe 134 të Kushtetutës së Republikës së Shqipërisë dhe ligjin nr 8.577, datë 10.02.2000, “Për Organizimin dhe Funksionimin e Gjykatës Kushtetuese”, vendosi: “Pranimin pjesërisht të kërkesës: “shfuqizimin e vendimit nr 1, datë 22.08.2014 të Këshillit Kombëtar të Territorit, “Për Harmonizimin e Instrumenteve të Planifikimit Vendor në funksion të ndarjes së re Administrativo-Territoriale”, – lexohet në njoftimin për shtyp.

Ky vendim, sipas kryeministrit parandalonte rrënimin e mëtejshëm të territorit, ndërsa shtoi se lejet e dhëna deri më sot nuk do pezullohen, por do të verifikohet ligjshmëria e tyre.