Blushi: Protesta e PD, çrregullim trafiku. Ku do shkoni, drejt 21 janarit apo 14 shtatorit?

Deputeti i Partisë Socialistë, Ben Blushi gjatë fjalës së tij nga foltorja e Kuvendit e cilësoi protestën e sotme të PD asgjë më tepër se sa një çrregullim në trafik.

Sipas tij PD, ka zgjedhur të përdorë dhunën si kur ka qenë në pushtet, ashtu edhe tani që është në opozitë.

“Pyetja ime për ju është, ku do shkoni: do shkoi drejt 21 janarit apo 14 shtetarit”, tha Blushi.

“Plani që keni ju; kërkoni qeveri teknike dhe zgjedhje të parakohshme. Qeveria jonë teknike është.

Kërkoni zgjedhje të parakohshme, ka një mundësi. Perceptimi i përgjithshëm është se PS nuk e do reformën në drejtësi. Ka ardhur koha të bëhet prezent drafti. Nuk besoj se ju do keni mundësi të bllokoni reformën në drejtësi. Shkojmë në referendum është njësoj si të shkojmë në zgjedhje të parakohshme, kjo klasë politikë nuk pastrohet dot me zgjedhje, kjo klasë politike ka ardhur koha të pastrohet nga drejtësia”, deklaroi deputeti i PS.

Blushi e vlerësoi si mjaft pozitiv ligjin për decentralizimin, i cili sipas tij është një ligj që i shërben shumë mirë reformës territoriale të miratuar 1 vit më parë. Sipas Blushit, pushteti vendor duhet të ketë më tepër kompetenca, që nga menaxhimi i trafikut e deri tek emërimi i mësuesve apo infermierëve.