Božoviq udhëton sot në Uashington, nesër takohet me drejtorin e FBI-së Kash Patel

Ministri i Drejtësisë i Malit të Zi, Bojan Božoviq, udhëton sot në një vizitë zyrtare në Shtetet e Bashkuara të Amerikës, gjatë së cilës do të zhvillojë një sërë takimesh me zyrtarë të lartë amerikanë dhe përfaqësues të institucioneve ndërkombëtare, siç njoftojnë “Vijesti”.

Për nesër, 19 tetor, në Uashington është parashikuar takimi i Božoviqit me drejtorin e Byrosë Federale të Hetimeve (FBI), Kash Patel, ku, sipas raportimit të “Vijesti”, do të shqyrtohen çështje me rëndësi të veçantë për bashkëpunimin e dy vendeve në fushën e drejtësisë dhe të sigurisë, me fokus te sfidat që kërkojnë veprim të koordinuar të institucioneve kompetente.

Gjatë qëndrimit në Uashington, Božoviq do të zhvillojë edhe një sërë takimesh në Departamentin e Shtetit, ndër to me zëvendësndihmëssekretarin e shtetit Daniel Lawton, si dhe me përfaqësues të Departamentit amerikan të Drejtësisë, të Kongresit dhe të Këshillit Atlantik.

Në vazhdim të vizitës zyrtare, e cila do të zgjasë deri më 23 tetor, Božoviq do të qëndrojë në Nju Jork, ku në emër të Qeverisë së Malit të Zi do të nënshkruajë konventën e Kombeve të Bashkuara për luftën kundër krimit kibernetik. Me atë rast janë parashikuar edhe takime të nivelit të lartë me përfaqësues të OKB-së.