BSH: Çmimi i naftës dhe ushqimeve, ndikoi në rënien e inflacionit

Banka e Shqipërisë ka analizuar sot ndikimin e drejtpërdrejtë dhe të tërthortë në inflacion duke arritur në përfundimin se 75% e rënies së inflacionit në tremujorin e parë të vitit është shkaktuar nga nafta dhe ushqimet, shkak i cili motivoi edhe uljet e njëpasnjëshme të normës bazë të interesit të lekut në këtë fillim viti.

Sipas Bankës së Shqipërisë, pesha e lartë e naftës dhe ushqimeve thekson natyrën e përkohshme të inflacionit dhe vlerësimin se inflacioni do të stabilizohet gradualisht drejt vlerave më të larta më tej gjatë vitit.
Për muajt në vazhdim, pritet të eliminohet edhe baza e lartë krahasuese në çmimet e ushqimeve, që, i detyrohet më së shumti përmbytjeve të fillimit 2015, që sollën rritje të ndjeshme të çmimeve për shumë produkte bujqësore.

Sidoqoftë, inflacioni i ulët i tre muajve të fundit ka lënë gjurmë në projeksionet për inflacionin dhe rritjen ekonomike. Projeksioni për inflacionin vjetor gjatë këtij viti është ulur në 1.9%, nga 2.5% që ishte parashikimi në fillim të vitit.

Banka e Shqipërisë ben te ditur në raportin e politikës monetare për tremujorin e parë Banka e Shqipërisë se rimëkëmbja e rritjes ekonomike do të vazhdojë, ndonëse do të jetë më e ngadaltë dhe kthimi i inflacionit në objektiv do të ndodhë vetëm në fundin e vitit 2018.