Bushati në Kinë memorandum për lehtësimin e vizave
Thellimi i bashkëpunimit dy palësh në kuadër të Nismës 16+1 Kinë-Vendet e Evropës Qendrore dhe Lindore” ishte objekti i takimit të ministrit të Jashtëm Ditmir Bushati me homologun kinez Wang Yi.
Në ditën e dytë të vizitës së tij në Republikën Popullore të Kinës, Kryediplomati shqiptar kërkoi nga pala kineze mbështetje për projektet konkrete në energji, infrastrukturë, bujqësi, turizëm, kulturë dhe arsim. Gjithashtu sensibilizimin e investitorëve kinezë për klimën e mirë të biznesit në Shqipëri.
“Dëshiroj të ri konfirmoj angazhimin tonë në forcimin e miqësisë tradicionale dhe besimit reciprok midis vendeve tona” – u shpreh Ministri Wang Yi gjatë bisedës me Ministrin Bushati. Ai nënvizoi ndihmën e Shqipërisë për rikthimin e RPK-së në OKB dhe Këshillin e Sigurimit dhe vlerësoi politikën e Shqipërisë në njohjen e një Kine. “Shqipëria është pjesë e rëndësishme e Evropës Qendrore dhe Lindore dhe anëtare e Nismës së bashkëpunimit 16+1. Në këtë kontekst, falë përpjekjeve të saj dhe vendeve të tjera të EQL-së dhe Kinës, është rritur bashkëpunimi dhe mirëbesimi mes vendeve tona, por edhe ndërmjet vendeve të EQL-së, të cilat janë bërë shembull i bashkëpunimit rajonal, duke bërë të mundur kalimin në një fazë më të maturuar të bashkëpunimit” – vuri në dukje Ministri Ëang.
Ai konfirmoi mbështetjen e Qeverisë kineze për projekte me interes reciprok në kuadër të bashkëpunimit dypalësh dhe vullnetin për të marrë pjesë në më shumë projekte në fushat e energjisë, infrastrukturës dhe industrisë.
Nga ana e tij, Ministri Bushati konfirmoi vullnetin për intensifikimin e mëtejshëm të lidhjeve dhe bashkëpunimit me Kinën.
Për vitin 2016, Kina renditet si partneri i dytë tregtar i Shqipërisë.
Duke siguruar palën kineze, se Shqipëria njeh politikën e një Kine të vetme, Ministri Bushati shprehu vullnetin e palës shqiptare për forcimin e mëtejshëm të dialogut ndërshtetëror në të gjitha nivelet: mes dy qeverive, parlamentar, akademik, kulturor dhe në të gjitha fushat me interes reciprok.
Në kuadër të Nismës 16+1, Ministri Bushati ri konfirmoi vullnetin e palës shqiptare për thellimin e bashkëpunimit në drejtim të zhvillimit të infrastrukturës rrugore, hekurudhore, portit dhe aeroportit nën parimin e përfitimit të ndërsjellë. Ai shprehu gatishmërinë për të diskutuar në mënyrë aktive me palën kineze mbi bashkëpunimin për ndërtimin e rrjeteve të transportit rajonal, duke eksploruar mundësitë e bashkëpunimit Shqipëri + Kinë + vendet EQL në këtë fushë si edhe zgjerimin e nismës edhe me anëtarë të tjerë të rajonit.
Memorandum për vizat dhe godinat e ambasdave-
Në përfundim të takimit, palët nënshkruan Memorandumin e Mirëkuptimit midis dy MPJ-ve për lehtësimin e ndërsjellë të procedurës së vizave dhe Marrëveshjen për godinat e ambasadave në prani të mediave.
Ministri Bushati u takua dhe me Kryetarin e Departamentit për Çështjet Ndërkombëtare të PKK-së, z.Song Tao, si dhe ishte i ftuar special dhe mbajti një fjalë në Institutin për Studime Evropiane pranë Akademisë së Shkencave Shoqërore të Kinës me temë “Kina dhe vendet e Evropës Jug-lindore: nga konkurrenca në bashkëpunim”.
