Çmimi i energjisë: ERE nis shqyrtimin e kërkesave të kompanive publike OSHEE, KESH, OST

Nga data 1 janar 2015, heqja e fashës 300 kwh/muaj pritet të ndryshojë çmimin e energjisë, që sot është 7.7 lek/kwh, por se sa do të jetë ky ndryshim, i mbetet vendimit që duhet të merret brenda muajit dhjetor nga Enti Rrregullator i Energjisë (ERE).
ERE ka nisur sot seancat dëgjimore me OSHEE, (Operatori i Shpërndarjes së Energjisë). Kjo kompani ka kërkuar rritjen e çmimit të energjisë elektrike ndaj konsumatorëve familjarë me 5 lek/kwh, pra nga 7 lek/kwh që është sot, kërkon që çmimi të jetë në 12 lek/kwh.
KESH ka depozituar kërkesën pranë ERE-s duke kërkuar që çmimi të rritet nga 2.2 lekë/kwh, në 3.4 lekë/kwh për energjinë e shitur tek OSHEE.
Ndërsa OST (Operatori i Transmetimit të Energjisë) nga 0,65 lek/kwh që trasmeton sot energjinë në transmetim, kërkon të bëhet 0,71 lek/kwh, dhe kjo tarifë që i faturohet OSHEE-së.
Financat synojnë çmim mesatar 10.6 lek/kwh/muaj nga 1 janari 2015, duke përfshirë çmimin aktual 7.7 lekë për konsum nën 300 kwh/muaj dhe 13.5 lek/kwh/muaj mbi 300 kwh, me një çmim të përbashkët për gjithë konsumatorët, pavarësisht sa konsumojnë në muaj energji.
Tregu i energjisë në shitje dhe blerje ka akumuluar një zinxhir detyrimesh në vlerën 1 miliardë usd, ndaj pritet që ERE të vendosë ndryshimin në çmimin aktual.
Me ndryshimet në projektligjin e ri “Për energjinë” që pritet të miratohet brenda muajit dhjetor dhe do të hyjë në fuqi në 1 janar 2015, thellimi i lieralizimit të tregut pritet që të sjellë ndryshime nga viti 2016 në çmim, por më parë duhet që ERE me ristrukturimin e tarifave mes operatorëve të kërkojë eleminimin e efektit zinxhir të borxheve mes tyre.
Deputeti i Partisë Socialiste dhe kreu i Komisionit të Ekonomisë në Kuvend, Erjon Braçe konsideron se kërkesat e OSHEE, KESH dhe OST për rritjen e çmimit të energjisë, janë të pajustifikuara. Braçe ka kërkuar që Enti Rregullator i Energjisë të marrë përgjegjësinë që të mos lejojë që keqmenaxhimi në sistem të bëhet argument për tarifat e reja.