Çudia në listat MEGA dhe PAD, i gjithë fisi deputetë

Listat e kandidatëve për deputet të paraqitura në KQZ gjithnjë ngjallin interes, për të parë se kush janë ata që do të përfaqësojnë qytetaret në parlamentin e ardhshëm.

Por veç interesit të madh, në listat e 15 partive që do të marrin pjesë në zgjedhjet e 18 qershorit, ka dhe disa fakte që janë në kufijtë e qesharakes. Instituti për Studime Politike ka publikuar rastet e dy partive, ku mes 140 kandidatëve, 15 janë pjesëtarë të së njëjtës familje.

Më konkretisht, Partia MEGA, kandidon me 15 kandidatë nga familja Buzuka. Ku siç duket në listë janë veç babait, Dhimitër Buzukës janë dhe 5 fëmijët e tij, por dhe nipat e tij, të gjithë pjesëtarë të një familje.

Të njëjtën situatë ka dhe Partia Aleanca Demokratike, ku Eduart Abazi, kryetari i kësaj partie, veç vajzës së tij ka vendosur në listën e kandidatëve dhe 13 pjesëtarë të tjerë të familjes Abazi. Mes tyre, 3 vëllezërit e tij dhe të afërm të tjerë.