Hoxha me studentët e Madridit: E ardhmja e Shqipërisë, e ankoruar brenda familjes europiane

Në vijim të vizitës së tij zyrtare në Spanjë, Ministri për Evropën dhe Punët e Jashtme, Ferit Hoxha, ka zhvilluar një takim me studentët e Universitetit Carlos III të Madridit.

Në një postim në rrjetet sociale pas këtij takimi, Hoxha shprehet se çdo bisedë mbi Europën duhet të përfshijë patjetër të rinjtë, pasi idetë e tyre e sfidojnë politikën të bëjë më shumë.

“Çdo bisedë kuptimplotë mbi Europën duhet domosdoshmërisht të përfshijë të rinjtë. Pata një shkëmbim vërtet përmbajtësor, energjik dhe frymëzues me studentët e Universitetit Carlos III të Madridit, kureshtja, mendimi kritik dhe angazhimi i të cilëve nxjerrin në pah rolin jetik që të rinjtë luajnë në formësimin e së ardhmes së Europës.

Dialogu me të rinjtë nuk është vetëm pasurues, ai është thelbësor. Pyetjet, idetë dhe pritshmëritë e tyre na sfidojnë të bëjmë më shumë, të udhëheqim me integritet dhe të sigurojmë që projekti europian të mbetet dinamik, gjithëpërfshirës dhe i orientuar drejt së ardhmes.”, shkruan ministri.

Më tej, Hixha shprehet se në këtë takim, pati mundësinë t’u përgjigjej pyetjeve të studentëve mbi rrugëtimin e Shqipërisë përmes reformave, qeverisjes së mirë dhe forcimit të shtetit të së drejtës, procese transformuese që vazhdojnë ta afrojnë vendin tonë me Bashkimin Europian.

“U impresionova veçanërisht nga interesi i tyre i fortë për zgjerimin e BE-së, një domosdoshmëri për Shqipërinë, por edhe një investim i qartë strategjik për vetë BE. Theksova rolin qendror që çështjet e BE-së zënë në jetën tonë të përditshme politike dhe në përpjekjet tona të vazhdueshme për modernizim, duke e ankoruar fort të ardhmen tonë brenda familjes evropiane, së cilës i përkasim natyrshëm.

Është inkurajuese të ndash me këtë brez të ri bindjen se në këto kohë të ndërlikuara dhe të pasigurta, BE-ja duhet të vazhdojë të dëshmojë unitet, kohezion dhe vizion.”, shton ai.

Sjellim ndërmend se ditën e djeshme, ministri Hoxha, vizitoi Senatin e Spanjës, ku u takua me Zëvendëskryetarin e Parë, Javier Maroto, Kryetaren e Komisionit për Punët e Jashtme, Pilar Rojo Noguera, si dhe me anëtarë të Senatit në Madrid.