Daçiq: OKB e ka refuzuar Kosovën për UNESCO

Zbatimi i rezolutës 1244 të Këshillit të Sigurimit të Organizatës së Kombeve te Bashkuara, do të mbetet bazë e politikës së kësaj organizate. Kështu kanë rënë dakord sot në një takim Sekretari i Përgjithshëm i OKB-së Ban Ki-moon dhe Ministri i Jashtëm i Serbisë, Ivica Daçiq.

“Sekretari i përgjithshëm e ka konfirmuar se misioni i UNMIK-ut në Kosovë, do të funksionojë edhe në bazë të Rezolutës 1244 dhe do të vazhdojë të jetë baza e politikës së OKB-së ndaj problemit të Kosovës”, ka thënë Ivica Daçiq për gazetën serbe Tanjug, pas bisedimeve të tij me Ban Ki-moon në New York, transmeton Klan Kosova.

Është shumë e rëndësishme për ne, sepse besojmë se OKB do ta mbajë në jetë dokumentin e vetëm ligjor dhe të vlefshëm ndërkombetar për Kosovën”, ka thënë Daçiq, duke theksuar se dokumenti është neutral ndaj statusit të Kosovës, dhe për këtë arsye duhet parandaluar lëvizjet e njëanshme nga Prishtina.

Daçiq e ka konfirmuar se në bisedën me Sekretarin e Përgjithshëm të OKB-së mbi aplikimin e Kosovës për anëtarësim në UNESCO, kjo organizatë ka refuzuar ta transferojë kërkesën e anëtarësimit të Kosovës në UNESCO, dhe se gjithçka do të mbetet në përputhje me Rezolutën 1244.

Nga takimi, gjithashtu është bërë e ditur se Ban Ki moon, në fund të vitit, në dhjetor apo në shkurt, do ta vizitojë Beogradin.