Danielsson: Djegia e mandateve minon procesin integrues
Drejtori i Përgjithshëm për politikat evropiane, fqinjësi dhe negociimet e zgjerimit, Christian Danielsson, duke iu përgjigjur interesit të mediave theksoi se dialogu është i domosdoshëm në demokraci, teksa shtoi se situate aktuale ku opozita ka djegur mandatet nuk ndihmon integrimin e vendit dhe për këtë ai ka njoftuar dhe krerët e opozitës.
“Parlamenti është thelbësor në demokraci. Parlamenti duhet të luaj rolin e tij plotësisht. Kjo është përgjegjësi e shumicës, por dhe e opozitës. Bojkotimi i parlamentit nuk është në një linjë me qasjen tonë dhe dialogu është i domosdoshëm në demokraci”, tha Danielsson.
Sipas tij, institucioni i parlamentit është i domosdoshëm dhe duhet të jetë i tillë dhe për mazhorancën dhe për opozitën.
I pyetur nëse djegia e mandateve nga opozita, dëmton vendin në procesin e integrimit, Drejtori i Përgjithshëm për politikat evropiane, fqinjësi dhe negocimet e zgjerimit, u shpreh se situata nuk ndihmon fare. “Nuk ndihmon fare për procesin fakti që Parlamenti apo që opozita nuk është në kuvend. Këtë e diskutuam sot dhe e bëra shumë të qartë te opozita”.
“Siç e thashë dhe më parë, për integrimin në BE, është e nevojshme që një vend të ketë progres të vazhdueshëm në luftën kundër korrupsionit, luftën ndaj krimit, apo te drejtësia në tërësi, në rastin tuaj te vetting-u. Jemi duke ndjekur situatën nga shumë afër dhe të gjitha hapat që janë ndërmarrë”, theksoi Drejtori i Përgjithshëm për politikat evropiane fqinjësi dhe negocimet e zgjerimit Christian Danielsson.
Lidhur me hapjen e negociatave, Danielsson u shpreh se, po punon për hartimin e raportit që do i dorëzohet Këshillit dhe ky i fundit do të marrë vendimin final. “Është me rëndësi të paraqesim një raport objektiv për ato që thashë dhe më lart, luftën ndaj korrupsionit, krimin, ecurinë e vetting-ut, drejtësinë në tërësi. Raporti i dërgohet Këshillit dhe Këshilli merr vendim. Në këtë pikë, thjesht jam i përqendruar te përpilimin e raportit”, tha Drejtori i Përgjithshëm për politikat evropiane fqinjësi dhe negocimet e zgjerimit Christian Danielsson.
