Danimarka garanton hua 113 milionë dollarëshe për prodhuesin ukrainas të dronëve dhe raketave Fire Point

Danimarka do të garantojë një hua prej 750 milionë koronash, rreth 112,6 milionë dollarë, për degën daneze të kompanisë ukrainase të dronëve dhe raketave Fire Point, njoftoi të mërkurën qeveria daneze.

Sipas Reuters, huaja do të mbështetet nga shteti danez, sepse lufta në Ukrainë e pengon kompaninë Fire Point të marrë hua me kushte të zakonshme në Danimarkë. Financimi do të kanalizohet përmes fondit danez të eksportit dhe investimeve EIFO.

Danimarka kishte njoftuar vitin e kaluar se prodhuesi ukrainas i armëve do të niste në tokën daneze prodhimin e karburantit për raketat me rreze të gjatë veprimi. Fabrika daneze e karburantit për raketa pritet të hyjë në funksionim deri në fund të vitit 2027.

Sipas ministrit danez të Mbrojtjes, Jeppe Bruus, duke e bazuar prodhimin jashtë vendit, Ukraina mund ta mbrojë zinxhirin e saj të furnizimit nga sulmet ruse, theksoi Reuters.

Fire Point ka nënshkruar marrëveshje me më shumë se një duzinë kompanish evropiane të mbrojtjes për radarë, sisteme drejtimi dhe përbërës të tjerë për projektin e mbrojtjes raketore Freyja, i cili synon t’i japë Ukrainës një alternativë vendase ndaj sistemit amerikan Patriot.