Del një tjetër Ermal Hoxha, pronar i 3 restoranteve në Gjermani e Norvegji

Sipas këtij televizioni, që i referohej një dokumentacioni të siguruar nga kompania ndërkombëtare “Orbis”, Ermali që u arrestua në operacionin antidrogë që çoi në zbulimin e laboratorit të kokainës në Elbasan, ishte aksioner në restorantin “Pizza Paradaise” në Neustadt të Gjermanisë, ku xhiroja vjetore rezulton të jetë 13 milionë dollarë, bashkë me Vojsava Tagën. Po sipas këtij informacioni Ermal Hoxha kishte një tjetër restorant me emrin “Zur Bruecke” në Betriebs dhe restorantin “TWINS Restourants”, në Moss të Norvegjisë.

Por pas publikimit të këtij lajmi të dhënë nga “Channel One” në adresë të lapsi.al mbërritën disa e -maile, sipas të cilëve bëhej fjalë për një tjetër Ermal Hoxha dhe jo për nipin e ish -diktatorit të arrestuar për trafik droge.

Pronari i 3 restoranteve rezulton të jetë Ermal Xhavit Hoxha, një 38 -vjeçar i lindur në Tiranë, që kishte banuar në Krujë për disa vite dhe që jetonte prej 17 vjetësh në Gjermani. Ai ndohet aktualisht në Shqipëri, për shkak se babai i tij ka probleme shëndetësore. Ermal Xhavit Hoxha thotë se ai është bashkëpronar me Vojsava Tagën, që është bashkëshortja e mikut të tij.

Në një reagim për disa media, pronari i vërtetë i 3 restoranteve ka thënë se ai nuk ka asnjë lidhje me nipin e ish -diktatorit, me të cilin në fakt ka të ngjashëm vetëm emrin dhe mbiemrin.