Dendias dhe Pistorius në Kretë: Greqia dhe Gjermania drejt prodhimit të përbashkët të sistemeve të mbrojtjes

Ministri grek i Mbrojtjes, Nikos Dendias, priti të mërkurën në Poligonin e Qitjes të Kretës (NAMFI) homologun gjerman Boris Pistorius, në një takim dypalësh kushtuar sfidave të sigurisë në Evropë dhe thellimit të bashkëpunimit në industrinë e mbrojtjes. Siç njofton Ministria greke e Mbrojtjes, të dy ministrat ndoqën edhe qitje të sistemeve kundërajrore Patriot dhe Leflasys-Ozelot, si dhe qitjen e certifikimit të sistemit të ri IRIS-T SLM, në kuadër të stërvitjes vjetore të mbrojtjes ajrore “Spartan Arrow – 26”.

Në deklaratat e përbashkëta, Dendias nënvizoi vullnetin e Athinës për të forcuar marrëdhëniet ushtarake me Berlinin: më shumë stërvitje të përbashkëta, mikpritje të forcave gjermane në Greqi, ndërveprueshmëri më të lartë dhe zhvillim të platformave të përbashkëta. Sipas raportimit të ERT-së, ai theksoi se të dyja vendet ndodhen në një kthesë vendimtare të ristrukturimit të forcave të tyre të armatosura — Greqia me “Axhendën 2030” dhe Gjermania me programin e saj ambicioz të pajisjeve.

Bashkëpunimi, tha ministri grek, nuk duhet të mbetet te platformat tradicionale: mbrojtja kibernetike, sistemet pa pilot, inovacioni dhe teknologjitë e reja hapin rrugën për të kaluar nga bashkëpunimi i thjeshtë në prodhim të përbashkët dhe zhvillim të përbashkët të aftësive mbrojtëse.

Dendias foli edhe për një qasje 360 gradë ndaj sigurisë evropiane: përveç frontit verior dhe luftës në Ukrainë, Evropa duhet të ndjekë nga afër edhe Afrikën e Veriut, Sahelin dhe Lindjen e Mesme, ndërsa forcimi i aftësive mbrojtëse evropiane, shtoi ai, e plotëson NATO-n dhe nuk i kundërvihet Aleancës.

Nga ana e tij, Pistorius falënderoi për mikpritjen në Kretë dhe theksoi, siç transmeton ERT, se mbrojtja ajrore është një aftësi që po bëhet gjithnjë e më e rëndësishme, në një kohë kur të dyja vendet po investojnë fuqishëm në modernizimin e forcave të tyre.