Dënohen dy persona në Prishtinë për shitje të narkotikëve, konfiskohen paketime me kokainë

Gjykata Themelore në Prishtinë ka shpallur aktgjykim dënues ndaj dy personave për vepra penale të lidhura me narkotikët, siç transmeton lajmi.net. Aktgjykimi u shpall të martën nga Departamenti për Krime të Rënda i kësaj gjykate.

Sipas vendimit, A.P. u dënua me katër vjet burgim dhe 3 mijë euro gjobë, ndërsa G.H. me dy vjet burgim dhe 2 mijë euro gjobë. Të dy u shpallën fajtorë për blerjen, posedimin, shpërndarjen dhe shitjen e paautorizuar të narkotikëve, substancave psikotrope dhe analoge, të kryer në bashkëkryerje. Përveç kësaj, A.P. u shpall fajtor edhe për një vepër tjetër penale që lidhet me narkotikët.

Gjykata ka urdhëruar konfiskimin e 10 paketimeve me kokainë, me peshë totale prej tre gramësh, të një këllëfi të armës dhe të qeseve të najlonit që shërbenin për paketimin e marihuanës.

Përveç dënimeve me burgim dhe gjobave, të dy të dënuarit obligohen të paguajnë nga 100 euro për shpenzimet e paushallit gjyqësor dhe nga 50 euro për Fondin për Kompensimin e Viktimave të Krimit. Në rast se gjobat nuk paguhen, ato mund të zëvendësohen me burgim, me një ditë burg për çdo 20 euro të papaguara.

Aktgjykimi nuk është i formës së prerë dhe palët kanë të drejtë ankese në Gjykatën e Apelit brenda 30 ditëve nga pranimi i aktgjykimit.