Disiplinimi i tregut, industrialistët mbështesin aksionin e qeverisë

Shoqata e Industrialistëve Ushqimorë ka shprehur mbështetjen e saj për aksionin për disiplinimin e tregtimit të mishit, të nisur nga ministri i Bujqësisë, Edmond Panariti.

Kryetari i kësaj shoqate, Alban Zusi e cilësoi aksionin të nevojshëm për të garantuar produkte të shëndetshme dhe të sigurta për qytetarët.

Ai tha se, kjo iniciativë e Ministrisë së Bujqësisë do të ndikojë ndjeshëm edhe në përmirësimin e imazhit të produkteve të industrisë përpunuese vendase.

“Përveç garantimit të qytetarëve për atë çka ata konsumojnë, ky aksion përmirëson imazhin e produkteve të industrisë përpunuese vendase. Në të njëjtën kohë, ai bën edhe rregullimin e tregtimit, duke rritur shanset për hapjen e eksporteve të produkteve me origjinë shtazore. E si pasojë me impakt të drejtpërdrejtë në rritjen ekonomike dhe punësim”, deklaroi Zusi.

Ai shtoi se, Shoqata e Industrialistëve Ushqimorë mbështet dhe do të mbështesë të gjitha iniciativat e qeverisë, të cilat lidhen me rregullimin e tregut dhe në mënyrë të veçantë ato për sigurinë e ushqimeve.