Dita e të zhdukurve, EULEX: Misioni vazhdon me përkushtim

Në prag të ditës Ndërkombëtare të Personave të Zhdukur, shefi i Eulex-it Gabriele Meuçi, deklaron se ky misioni është i përkushtuar në mbështetjen e institucioneve të Kosovës për përcaktimin e fatit të personave të pagjetur në çdo mënyrë të mundshme.

Eulexi dërgoi një komunikatë ku citohet shefi i misionit të ketë thënë se kjo është një çështje thelbësore e cila prekë shumë familje në Kosovë dhe në të njëjtën kohë tejet e rëndësishme për misionin.

“EULEX-i u kontribuon kërkimeve të Kosovës për personat e pagjetur përmes një ekipi me ekspertë të forenzikës. Ata vazhdojnë të punojnë së bashku me Departamentin për Mjekësi Ligjore në Ministrinë e Drejtësisë të Kosovës me përpjekje intensive për përcaktimin e fatit të personave të pagjetur”, thuhet në komunikatën e Eulexit.

Eulexi njofton se që nga viti 2008 kur filloi punën, familjarëve u janë kthyer mbetjet mortore të 483 viktimave. Kosova numëron edhe rreth 1600 persona të zhdukur që nga lufta e fundit.