DW: Si mund të gjejnë punë refugjatët në Gjermani

Ata janë kryesisht të rinj, meshkuj dhe mjaft të motivuar, por nuk është e thjeshtë të gjendet një vend pune për refugjatët. Ky është rezultati i një studimi të Institutit të Berlinit për Popullsinë dhe Zhvillimin.

Nga Volker Witting, Deutsche Welle.

Kay Kornatzki mbetet optimist: “Po, ne do t’ia dalim”, i thotë ai Deutsche Ëelles, duke cituar fjalët e kancelares. Ai është drejtor ekzekutiv i një punishteje për mësimin e zanateve që kanë të bëjnë me ndërtimin.

Që nga muaji mars këtu mësojnë 13 refugjatë për ndërtimet në thellësi, në lartësi si dhe bazat e mjeshtërisë së ndërtimit. Kjo është një nismë e shoqatës së profesioneve të sektorit të ndërtimit. “Pika kyçe tek refugjatët është gjuha”, shpjegon Kornatzki, në punishten mësimore, që tani duket paksa e zbrazur. Shumë nga nxënësit ndërkohë kanë shkuar në pushimet e verës ose për praktika.

Në mars këtu 13 refugjatë, që u përzgjodhën nga njëqind gjithsej, nisën një kuafilim të shpejtë për zanate si murator, marangoz si dhe kurset e gjermanishtes.

Në Berlin ka shumë nevojë për punëtorë ndërtimi. Vetëm në vitet e ardhshme në kryeqytet do të ndërtohen mbi 100.000 banesa. “Ne kemi nevojë për këdo”, thotë Kornatzki. “Por mungesa e punonjësve të kualifikuar në Gjermani nuk mund të kompensohet vetëm nga refugjatët.”

Kornatazki dhe iniciativës së tij i dalin gjithnjë e më shumë pengesa burokratike gjatë punës me refugjatët. Nga 13 refugjatë që ai kishte në kujdestari, tani kanë mbetur vetëm shtatë. “Të tjerët i tërhoqën për kurse integrimi.”

Këto kurse shtetërore janë të detyrueshme për refugjatët. Atje ata mësojnë gjermanisht dhe marrin një orientim bazë. Kjo është katastrofale për Kornatzki dhe nismën e tij, sepse refugjatët e rinj kësisoj shkëputen nga projekti i tij. “Një kualifikim i përshtatshëm krahas kurseve të integrimit duhet të garantohet në perspektivë afatgjatë, por tani për tani një gjë e tillë është ende e vështirë.”

Për të tilla probleme burokratike tërheqin vazhdimisht vëmendjen punonjësit e dhjetë nismave për refugjatët, të cilat janë hulumtuar së fundi, vë në dukje autori kryesor i studimit “An die Arbeit”, Reiner Klingholz nga Instituti i Berlinit për Popullsinë dhe Zhvillimin. Ai dhe punonjësit e tij kanë parë me kujdes se si funksionon në Gjermani integrimi në punë dhe se sa të rëndësishme janë për këtë nismat për refugjatët.

Nismat lokale janë të suksesshme në ndërmjetësimin e vendeve të punës

Rreth 800.000 vetë vitin e kaluar kanë ardhur si refugjatë në Gjermani. Tre të katërtat e tyre janë nën 30 vjeç, shumica janë meshkuj. Por parashikimi “sot refugjat – nesër një punë të re”, nuk është realist, thotë Klingholz.

Vetëm rreth dy përqind e emigrantëve flasin gjermanisht dhe vetëm pak prej tyre kanë një kualifikim profesional apo ndonjë shkollim tjetër të rregullt. “Veç kësaj shumica duan mundësisht sa më shpejt të fitojnë para”, nënvizon Klingholz. T’u bësh të qartë refugjatëve se pa kualifikim profesional sipas standardeve gjermane nuk ke perspektivë për një punë të mirë, kjo është e vështirë.

Në vitin e parë të qëndrimit mesatarisht gjejnë punë vetëm tetë përqind e azilkërkuesve. Edhe sipërmarrjet e mëdha janë për kancelarin mjaft të ngurta.

Nisma për refugjatët “Ne së bashku”, në të cilën bashkëveprojnë rreth 100 sipërmarrje gjermane, deri tani ka punësuar vetëm 450 refugjatë. Kancelarja do ta ndryshojë këtë dhe do ta shqyrtojë hapur çështjen. Në mes të shtatorit ajo në samitin për refugjatët me kryetarët e kryesive të sipërmarrjeve kryesore gjermane synon t’i sensibilizojë ata, në mënyrë që të ofrojnë më shumë vende për kualifikim dhe punësim të refugjatëve.