Dy ditë romantike me Dren Abazin dhe Gent Rushin në Paris

Një prezantim ndryshe i këngëtarit të  mirënjohur Dren Abazi , më 13 dhe 14 shkurt në koncertin  “Le Blues des Ballkans”  në teatrin, Les Rendez Vous d’Ailleurs,  do te mbledhë publikun parizian dhe komunitetin shqiptar qe jeton në Francë, njoftoi sot ATSH-në, organizatori i kësaj ngjarje muzikore Rezart Jasa.

Sipas tij do të jenë dy koncerte qe këngëtari Dren Abazi së bashku me instrumentistin e talentuar  Gent Rushi  do të japë në Paris, për një publik të zgjedhur , i cili sipas të gjitha gjasave duket se i ka mirëpritur me interes të madh artistët shqiptarë për profesionalizmin dhe nivelin e tyre të lartë artistik.

Axhenda e këngëtarit Dren Abazi dhe programacioni i kompanisë ”Rezart Jasa Events”,  bëri  që ky koncert të mundësohej më 13 dhe 14 shkurt  në dy dite speciale, më 13 shkurt , dita e lindjes së  këngëtarit dhe me 14 shkurt  dita e të dashuruarve. Kjo ishte edhe aryseja që koncerti u konceptua ndryshe dhe se Dren  Abazi nuk shoqërohet këtë herë nga orkestra e tij .

“Ne vendosem  të ishte nje koncert aukustik, intim dhe ndryshe nga karakteri i deritanishem i interpretimeve të Dren Abazit. Këtë karakter romantik gjithashtu ia jep  shoqërimi në piano dhe fizarmonikë i Gent Rrushit, një artist i cili ka bashkëpunuar me artistët më të njohur të skenës shqiptare, pohoi për ATSH-në , Rezart Jasa.

Duoja Dren Abazi dhe Gent Rrushi është hera e parë që krijohet. Ngjarja, organizohet pas suksesit të koncertit të tetorit të  vitit 2013 në Paris, në teatrin Le Palace, ku Dren Abazi dhe Zig Zag Orketra , ndanë skenën me këngetaren Elina Duni, dhe ikonën e muzikës shqiptare Nexhmije Pagarusha, koncert të cilin “ Rezart Jasa Events”e organizoi në nder të  80 vjetorit të zonjes Nexhmije Pagarusha.

Në teatrin Les Rendez Vous d’Ailleurs  “Rezart Jasa Events” ka prezantuar shumë artistë shqiptarë, si Genc Tukiçi, Kladi Sahatçi, Mariza Ikonomi, Dhurata Lazo dhe Zija Bushi Bejleri, Vlashent Sata  Enris Qinami dhe artistë të tjerë .

Pronari i teatrit Philippe Bohe është entuziast për këtë  prezantim dinjitoz të artistëve shqiptarë në këtë skenë.