Dy persona plagoshen rëndë në dy aksidente trafiku gjatë natës në Beograd

Dy persona kanë pësuar lëndime të rënda trupore në dy aksidente trafiku që ndodhën gjatë natës së kaluar në Beograd, njoftoi shërbimi i Urgjencës së kryeqytetit, siç i përcolli agjencia Tanjug portalit Newsmax Balkans.

Të dy pacientët, pas ndihmës së parë në vendngjarje, u transportuan në institucionet shëndetësore kujdestare të Beogradit, ku po vijojnë trajtimin mjekësor. Detaje për identitetin e të plagosurve dhe rrethanat e sakta të dy aksidenteve nuk janë bërë të ditura.

Sipas të dhënave të Urgjencës, ekipet mjekësore ndërhynë gjithsej 130 herë gjatë natës, ndërsa 11 prej ndërhyrjeve u kryen në vende publike.

Nga shërbimi i Urgjencës bëjnë të ditur se thirrjet më të shpeshta gjatë natës erdhën nga pacientët kronikë dhe astmatikët, të cilët kërkuan ndihmë për përkeqësim të gjendjes shëndetësore.