E marrin nga shtëpia dhe e rrahin në një punëtori në Komoran, 26-vjeçari përfundon në Neurokirurgji me nofull e brinjë të thyera

Një rast i rëndë dhune është zbuluar në Komoran të Drenasit, ku një 26-vjeçar dyshohet se është marrë nga shtëpia e tij, është dërguar në një punëtori dhe është sulmuar fizikisht, duke pësuar lëndime të rënda trupore. Siç raporton Sinjali, ngjarja dyshohet se ka ndodhur më 14 tetor, rreth orës 20:00, kur Mërgim Ibriqi, Blinor Cakiqi dhe Ndriçim Cakiqi kanë shkuar me veturë te shtëpia e Labinot Dobrunës, 26 vjeç, në fshatin Llozicë të Malishevës dhe e kanë marrë atë me vete.

Sipas informatave të siguruara nga Sinjali, i riu është dërguar në Komoran, në rrugën “Ali Lladrovci”, te punëtoria “Moto Heli”, në pronësi të Mërgim Ibriqit, ku dyshohet se është nxjerrë nga vetura dhe është goditur fizikisht në pjesë të ndryshme të trupit. Pas sulmit, të dyshuarit dyshohet se e kanë futur sërish në veturë, e kanë kthyer në Llozicë dhe e kanë lënë të shtrirë pranë derës së shtëpisë së tij, ku më vonë e ka gjetur një fqinje, e cila ka ndihmuar që ai të marrë trajtim mjekësor.

Dobruna fillimisht është dërguar në Qendrën Kryesore të Mjekësisë Familjare në Malishevë, ndërsa për shkak të gjendjes së rëndë është transferuar me urgjencë në Qendrën Klinike Universitare të Kosovës në Prishtinë. Sipas informatave mjekësore të përcjella në kuadër të rastit, viktima ka pësuar fraktura në nofull, dy brinjë të thyera dhe lëndime në pjesën e shtyllës kurrizore, ndërsa vazhdon të trajtohet në Repartin e Neurokirurgjisë.

Policia e Kosovës, në raportin e saj 24-orësh, ka bërë të ditur se më 17 tetor është arrestuar njëri nga të dyshuarit, ndërsa sipas Sinjalit bëhet fjalë për Blinor Cakiqin, 25 vjeç, i cili pas intervistimit është ndaluar për 48 orë. Rasti është iniciuar për veprën penale “Lëndim i rëndë trupor”, ndërsa motivi i sulmit dhe përgjegjësia e secilit prej personave të përfshirë mbeten ende për t’u sqaruar nga hetimet.

Personat e përmendur në këtë rast prezumohen të pafajshëm derisa fajësia e tyre të mos provohet me vendim të formës së prerë të gjykatës.