Edhe MPJ-ja bullgare distancohet nga arratisja e Iva Mihajlovës: nuk ishim të njoftuar paraprakisht

Edhe Ministria e Punëve të Jashtme e Bullgarisë është distancuar nga rasti i Iva Mihajlovës. Siç njofton Nezavisen, ministria në Sofje pohon se nuk ka qenë e njoftuar paraprakisht për lëvizjet e Mihajlovës, të familjes dhe avokatit të saj, të cilat përfunduan me mbërritjen e saj në territorin bullgar, dhe se nuk ka marrë pjesë në organizimin e tyre.

Mihajlova, ndaj së cilës zhvillohet procedurë gjyqësore në Koçan, u shfaq në Bullgari ndonëse kishte masa aktive sigurie: që nga tetori 2025 i ishin marrë të dy pasaportat, i ishte ndaluar kalimi i kufirit me letërnjoftim dhe largimi nga Koçani.

Sipas njoftimit të Ministrisë së Brendshme në Shkup, në sistemin e kontrollit kufitar nuk ka asnjë evidencë që Mihajlova ta ketë lënë ligjërisht vendin, e as evidencë për hyrje të rregullt të saj në Bullgari. Mënyra se si ajo e kaloi kufirin mbetet ende e pasqaruar.

Rasti ka nxitur reagime të forta politike në Shkup, ku opozita kërkon përgjegjësi institucionale, ndërsa Ministria e Jashtme maqedonase një ditë më parë e kritikoi pritjen e saj në Sofje dhe njoftoi se do t’i informojë partnerët ndërkombëtarë për zhvillimet.