Egjipti hedh poshtë memorandumin turko-libik: është absolutisht i pavlefshëm dhe pa asnjë fuqi ligjore

Kajroja iu bashkua të mërkurën zërave që hedhin poshtë ratifikimin e memorandumit turko-libik nga parlamenti i Libisë lindore. Në një deklaratë të gjatë, të cilën e përcjell ERT duke cituar agjencinë APE-MPE, Ministria e Jashtme e Egjiptit shpreh refuzimin kategorik të vendimit të Dhomës së Përfaqësuesve të Libisë për memorandumin e vitit 2019, të nënshkruar mes qeverisë së atëhershme të Fayez al-Sarraj dhe Turqisë për përcaktimin e zonave të juridiksionit detar në Mesdhe.

Sipas deklaratës së ministrisë egjiptiane, memorandumi është absolutisht i pavlefshëm, nuk ka asnjë fuqi ligjore dhe nuk prodhon asnjë pasojë juridike për Egjiptin, ndërsa edhe vetë ratifikimi nga parlamenti libik nuk krijon asnjë pasojë ligjore për Kajron.

Ministria thekson se memorandumi shkel parimet e së drejtës ndërkombëtare të detit dhe dispozitat e Konventës së OKB-së për të Drejtën e Detit të vitit 1982, që lidhen me përcaktimin e zonës ekonomike ekskluzive dhe të shelfit kontinental, dhe përbën një cenim të qartë të të drejtave sovrane të Egjiptit në zonën e tij ekonomike ekskluzive dhe në shelfin e tij kontinental.

«Në masën që ky memorandum bie ndesh me kufijtë detarë të shpallur të Egjiptit, Egjipti ruan të drejtën e tij për të mbrojtur të drejtat që ia garanton e drejta ndërkombëtare dhe për të përballuar çdo përpjekje për cenimin e tyre», thuhet në deklaratë. Kajroja kujton se e kishte kundërshtuar kategorikisht memorandumin që në fillim dhe përsërit refuzimin e tij, si dhe të çdo veprimi apo akti të bazuar në të.

Reagimi i Egjiptit vjen një ditë pasi parlamenti me seli në Bengazi, i cili për vite me radhë e kishte kundërshtuar marrëveshjen, e ratifikoi atë të martën, duke nxitur reagime të njëpasnjëshme nga Athina dhe Bashkimi Europian. Egjipti kishte nënshkruar në vitin 2020 me Greqinë marrëveshjen për përcaktimin e zonave detare mes dy vendeve, ndërsa Athina e cilëson memorandumin turko-libik të paligjshëm dhe pa asnjë vlerë.