Ekonomi në festën e Prezës: Të promovojmë produktet turistike të çdo zone
Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi, ka marrë pjesë sot në eventin e zhvilluar në Kalanë e Prezës të titulluar “Zhvillimi ekonomik dhe trashëgimia kulturore e Vorës”.
Në fjalën e saj Ekonomi deklaroi se traditat dhe trashëgimia kulturore janë një mundësi e madhe për zhvillim ekonomik të qendrueshëm, kryesisht të zonave të tilla të mëdha që përfshijnë disa fshatra siç është dhe Bashkia e Vorës.
Më tej, ministrja Ekonomi tha se ky vit është viti ndërkombëtar i turizmit të qendrueshëm, i shpallur nga OKB, dhe në gjithë botën po zhvillohen aktivitete të këtij lloji për të promovuar zona të ndryshme duke lidhur trashëgiminë kulturore me zhvillimin ekonomik dhe social të këtyre zonave. “Edhe eventi në Kalane e Prezës kishte pikërisht këtë synim, të sillte në një qendër të vetme gjithë produktet karakteristike të zonës, si në artizanat, në kulinari, bletari, verë, vaj ulliri etj”, tha ajo.
Ekonomi përshëndeti organizimin e këtij eventi duke kërkuar që të shënohet në kalendar dhe të bëhet i përvitshëm, që të shërbejë si mundësi për zhvillim të qëndrueshëm të rajonit. Ajo u kërkoi gjithashtu tur-operatorëve që ta shënojnë këtë ditë gjithashtu dhe ta përdorin këtë event të përvitshëm për të sjellë turistë në këtë zonë.
