Ekstradohen në Kosovë dy persona të kërkuar përmes INTERPOL-it, njëri nga Gjermania e tjetri nga Zvicra

Policia e Kosovës ka realizuar më 13 dhe 14 tetor ekstradimin e dy shtetasve kosovarë nga Gjermania, përkatësisht nga Zvicra, të cilët kërkoheshin përmes INTERPOL-it me letërrreshtime ndërkombëtare të lëshuara nga institucionet e drejtësisë së Kosovës, siç njofton Indeksonline duke iu referuar njoftimit të Policisë.

Sipas Policisë, operacioni u krye nga Drejtoria për Bashkëpunim Ndërkombëtar Policor, në koordinim me njësitet e tjera relevante të Policisë dhe institucionet e drejtësisë. Personat e ekstraduar ishin arrestuar më herët nga autoritetet e shteteve përkatëse.

Më 13 tetor, nga Gjermania u ekstradua një shtetase kosovare e dyshuar për blerje, posedim, shpërndarje dhe shitje të paautorizuar të narkotikëve, substancave psikotrope dhe analoge. Pas mbërritjes në Kosovë, ajo iu dorëzua njësive policore të rajonit të Pejës për vazhdimin e procedurave ligjore.

Një ditë më vonë, më 14 tetor, nga Zvicra u ekstradua një shtetas kosovar i kërkuar për veprën penale të grabitjes. Ai iu dorëzua policisë së rajonit të Gjilanit, ku do të vazhdojnë procedurat e mëtejme ligjore ndaj tij.

Policia ka theksuar se ekstradimet u realizuan në bazë të ligjeve në fuqi dhe falë bashkëpunimit të ngushtë ndërmjet institucioneve të Republikës së Kosovës dhe atyre të shteteve prej nga u kryen ekstradimet.