Ekzekutohet vëllai i ish-deputetit Arben Ndoka

Trupi i pajetë i 48-vjeçarit, u gjet nga familjarë të tij rreth orës 4 të mëngjesit në lagjen “Nënë Tereza” të qytetit të Lezhës. Ndoka është qëlluar nga persona të paidentifikuar, të cilët i zunë pritë në momentin kur po parkonte automjetin e tij tip “Mitsubishi”.

Autorët, që dyshohet të kenë qenë 2, ose 3 persona, kanë ndjekur lëvizjet e viktimës dhe kanë gjetur momentin e duhur për të mos lënë pas prova dhe dëshmitarë.

Aleksandër Ndoka, baba i 4 fëmijëve, dy vajza dhe dy djem, për policinë nuk kishte precedentë penalë. Prej pak kohësh ai ishte emëruar drejtor i Inspektoriatit Kombëtar të Mbrojtjes së Terriorit, për rajonin e Shkodrës, si dhe ishte edhe anëtar i Këshillit Bashkiak në Lezhë për Partine Socialiste.

Aleksandri njihej si vëllai i ish-deputetit Arben Ndoka, që u dorëhoq nga mandati pasi u prek nga ligji i dekriminalizimit, sepse rezultoi i dënuar në Itali.

Policia mori në pyetje disa familjarë të Ndokës, ndërkohë që po heton disa pista për ngjarjen e rëndë e cila tronditi qytetin.

Pak kohë më parë policia arrestoi djalin e tij Samuel Ndokën, i cili u përfshi edhe në një konflikt ditën e zgjedhjeve parlamentare të 25 qershorit.

Samuel Ndoka ishte në grupin e personave që sulmuan dhe plagosën në Shëngjin militantin e LSI-së, Florian Dushku.

Disa muaj më pas18-vjeçari u arrestua me akuzat e plagosjes, armëbajtes pa leje dhe kanosjes dhe pikërisht një nga pistat që po heton policia është ajo e konflkteve të djalit të tij.

Ngjarja e Shëngjinit ishte një nga më të rëndat në zgjedhjet 25 qershorit që solli reagimin e ashpër të ish-kryetarit të LSI-së, Ilir Meta, i cili akuzoi socialistët për dhunë.

Policia po kërkon autorët për të cilët nuk ka asnjë të dhënë, ndërsa janë marrë në pyetje familjarët dhe dëshmitarët. Po kontrollohen të dhënat në telefonin e viktimës.

Vëllai i viktimës, ish-deputeti Arben Ndoka për një kohë të gjatë u sulmua ashpër nga opozita nisur nga precedentët penalë të së kaluarës.

Ndoka u bë i njohur edhe për incidentin që ndodhi në Kuvend, kur sulmoi fizikisht deputetin demokrat, Gent Strazimiri. Pas lënies së mandatit të deputetit, ai vazhdoi të kishte rol të rëndësishëm në Partinë Socialiste të Lezhës.