Elbasan, protestojnë punonjësit e hekurudhës
220 punonjësit e hekurudhës së rajonit të Elbasanit i janë bashkëngjitur grevës kombëtare 1-ditore duke pezulluar punën në këtë sektor.
Në vazhdimësi të grevës së nisur dy muaj më parë pranë Autoritetit Portual të Durrësit, punonjësit e hekurudhës e kanë përshkallëzuar protestën e tyre, duke deklaruar se nuk do të ndalen deri në plotësimin e kërkesave.
“Duam plotësim kushtesh. Hekurudha është lënë pas dore. Ne kemi kërkesat tona: orët e natës dhe sigurimet shoqërore nuk janë paguar. Edhe pagat merren me vonesë”, thonë punëtorët.
Përpos kërkesave ekonomike, punonjësit e hekurudhës kanë dhënë edhe sugjerimet e tyre, të cilat mund të ndikojnë në ringritjen e këtij sektori. Sipas tyre, transporti i mineraleve dhe produkteve të tjera në drejtim të import-eksportit, transporti i çimentos me Malin e Zi dhe transporti i karburanteve nga Ballshi në drejtim të Vlorës të kryhen nga Hekurudha Shqiptare.
Ata kërkojnë edhe rihapjen e stacionit hekurudhor në Tiranë, si nyje kryesore në drejtimet Shkodër, Vlorë e Pogradec.
