Euroja dhe dollari fitojnë terren ndaj lekut

Valutat kryesore, euroja dhe dollari amerikan, kanë forcuar ndjeshëm pozitat përgjatë javës së dytë të muajit mars të këtij viti, në raport me lekun.

Sipas të dhënave të publikuara nga Banka e Shqipërisë monedha europiane është forcuar gjatë javës (9-13 mars) me 0,13 lekë. Ajo këmbehej në fillim të javës me 95,95 lekë dhe në fundjavë me 96,08 lekë.

Dollari amerikan këmbehet sot me 83,89 lekë kundrejt 83,02 lekëve që ishte të hënën. Monedha e gjelbër amerikane këtë javë u forcua me 0,87 lekë.

Ndërsa paundi britanik ndërkaq pas një rritjeje të vlerës ditën e hënë në vlerën 111,72 lekë, ka shënuar një rënie ditën e premte duke kapur kuotën e 111,22 lekëve, me një zbritje totale prej 0,5 lekë.

Franga zvicerane gjithashtu humbi terren gradualisht që nga dita e hënë duke u këmbyer sot me 106,42 lekë kundrejt vlerës 106,60 lekë që këmbehej ditën e hënë.