Eurostat: 35,7 për qind e grekëve në kufirin e varfërisë

Të paktën 35,7 për qind e grekëve u përballën me varfërinë apo me përjashtimin social gjatë vitit 2013, njoftoi GreekReporter, që citon të dhëna të Eurostat-it.

”Sipas të dhënave nga Eurostat-i, 23,1 për aind e grekëve mbetën në rrezikun e varfërisë edhe pas trnsfertave sociale, ndërkohë që 18,2 për qind kishin punësim të përkohshëm duke zënë vendin e parë në klasifikimin e vendeve anëtare të Bashkimit Evropian”, shkruan GreekReporter.

Për t’u konsideruar në rrezikun e përballjes me vafërinë, një qytetar duhet të ketë më pak se 60 për qind të të ardhurave mesatare kombëtare.

Në të dhëna absolute, rreth 3,9 milionë grekë u klasifikuan në rrezik varfërie apo përjashtim social, me një rritje prej 7,6 për qind për të shkuar në 35,7 për qind nga 28,1 për qind që ishte në vitin 2008.

Greqia radhitet e treta për rrezik varfërie apo përjashtim social, pas Bullgarisë me 48 për qind dhe Rumanisë me 40 për qind.