EuroVolley/ Greqia eliminohet në 1/16-at, mposhtet 3-2 nga Finlanda pas taj-brekut dramatik

Kombëtarja greke e volejbollit për meshkuj është eliminuar nga Kampionati Evropian (EuroVolley), pasi u mund 3-2 nga Finlanda në ndeshjen e fazës së 1/16-ave, të luajtur sot në Torino. Pas një beteje të vërtetë pesë setesh, finlandezët fituan me rezultatin 22-25, 25-16, 22-25, 25-23, 15-13.

Greqia e nisi mirë takimin dhe mori setin e parë 25-22, duke treguar qartësi në sulm. Por Finlanda u kundërpërgjigj fuqishëm në setin e dytë, të cilin e dominoi plotësisht me 25-16. Skuadra e trajnerit Kostas Christofidelis reagoi në setin e tretë dhe kaloi sërish përpara 2-1 me 25-22, duke u afruar një set larg çerekfinaleve.

Seti i katërt rezultoi fatal për grekët. Gabimet e shumta në momente kyçe i dhanë Finlandës mundësinë ta fitonte 25-23 dhe ta dërgonte ndeshjen në taj-brek. Edhe në setin vendimtar, gabimet vazhduan ta ndjekin Greqinë, ndërsa finlandezët u treguan më të ftohtë në pikët e fundit dhe e mbyllën 15-13, duke vulosur kualifikimin.

Trajneri Christofidelis u shpreh i zhgënjyer për mënyrën se si u humb ndeshja, por njëkohësisht krenar për skuadrën dhe për rrugëtimin në këtë turne, duke theksuar se Greqia tregoi karakter dhe luajti në nivel të lartë kundër një kundërshtari të fortë.

Pavarësisht eliminimit të dhimbshëm, Greqia e mbyll turneun me një paraqitje përgjithësisht shumë të mirë. Në Grupin A të fazës së grupeve në Modena, ajo fitoi tre ndeshje radhazi, përfshirë 3-1 ndaj Sllovakisë, dhe u rendit e treta pas Italisë dhe Sllovenisë. Ndërkohë, Finlanda kishte ardhur në këtë përballje pas një humbjeje befasuese 3-2 me Estoninë, por diti të shfrytëzonte momentin në Torino.

Burimi: ΦΩΣ