FBI: Shpërblim 3 milionë $, kush gjen hackerin rus Eugeniy Bogachev

FBI ka vendosur një shpërblim prej 3 milionë dollarësh për personin që do të ndihmojë në kapjen e hackerit rus Eugeniy Bogachev, i cili akuzohet për vjedhjen e të paktën 100 milionë dollarëve nga llogaritë bankarë online.

Sipas autoriteteve amerikane, ekzistojnë dyshime të forta se hackeri është fshehur në Rusi. Eugeniy Bogachev u akuzua nga FBI-ja në mesin e vitit 2014, por autoritetet amerikane nuk kanë mundur të bien në gjurmët e tij.

Sipas hetuesve, virusi i përdorur nga Bogachev, njihet me emrin “GameOver Zeus” dhe është një virus i sofistikuar, i krijuar posaçërisht për të vjedhur informacione bankare dhe të dhëna të tjera nga kompjuterët e infektuar. Akuzat e ngritura ndaj hackerit rus janë të mjaftueshme sa për ta lënë atë në burg gjatë gjithë jetës.

Në shkurt të vitit të kaluar, një tjetër hacker rus, Vladimir Drinkman, u ekstradua nga Holanda në SHBA, pasi akuzohet për vjedhjen e rreth 160 milionë kartave të kreditit, gjatë viteve 2005-2012.