Finalizohet operacioni “Synimi”: Sekuestrohen 4 kallëpë tritoli, 2 armë zjarri dhe 1500 fishekë

Policia e Tiranës ka finalizuar me sukses operacionin “Synimi” duke arrestuar në flagrancë shtetasin U.M që transportonte armë dhe municione, i cili dyshohet se i kishte marrë në fshatin Shëngjergj me qëllim shitjen në Tiranë për përdorim në ngjarje kriminale.

Gjatë operacionit me qëllim identifikimin dhe arrestimin e menjëhershëm të shtetasve të përfshirë në transportim dhe shitje të armëve shpërthyese dhe armëve të zjarrit, shtetasi U. M., 46 vjeç, banues në Tiranë u kap në flagrancë në rrugën e fshatit Shëngjergj dhe nga kontrolli i kryer në automjetin që drejtonte, u gjetën 4 kallëpë tritoli, 2 armë zjarri dhe 1500 fishekë të kalibrave të ndryshëm.

Armët dhe municioni u sekuestruan në cilësinë e provës materiale, së bashku me automjetin dhe celularin e të arrestuarit.

Policia bën gjithashtu të ditur se hetimi vijon me qëllim identifikimin e shtetasve të tjerë të përfshirë në këtë veprimtari kriminale ndërsa materialet tashmë i kanë kaluar prokurorisë për veprime të mëtejshme.