Flet MPB e Maqedonisë pas arrestimit të Sulejman Osmanit

Ministria e Punëve të Brendshme të Maqedonisë, është njoftuar nga Policia e Kosovës se të martën në fshatin Letnic të komunës së Vitisë është arrestuar Sulejman Osmani nga fshati i Brezës, i dyshuar për pjesëmarrje në ngjarjet e Kumanovës në maj, i cili u arratis duke ua treguar vendin policisë se ku ishte fshehur armatimi.

Nga MPB-ja kanë konfirmuar se Policia e Kosovës, ka vepruar në kuadër të fletarrestimit ndërkombëtar të lëshuar nga Maqedonia, ndërsa është konfirmuar edhe identiteti i personit.

Sipas policisë kosovare, në shtëpinë e Sulejman Osmanit është gjetur një pjesë e armatimit të vjedhur në Gushincë.

Baki Kelane, zëdhënësi i Policisë së Kosovës ka informuar se tek i dyshuari është gjetur dhe është konfiskuar edhe një revole me municion, ndërsa gjithë aksionin policia e ka kryer në koordinim me një prokuror publik gjegjës.