Gjykata e Moskës hedh poshtë apelin e Euroclear për asetet e ngrira

Një gjykatë në Moskë hodhi poshtë të enjten një apel nga Euroclear kundër një vendimi që ajo duhet të paguajë dëmshpërblim prej 233 miliardë dollar, bankës qendrore ruse në një mosmarrëveshje mbi ngrirjen e aseteve ruse në Evropë.

Gjykata mbështeti një vendim fillestar në maj kundër shtëpisë së kliringut me seli në Belgjikë. Vendimi është pjesërisht simbolik, pasi gjykatat ruse nuk kanë juridiksion në Bashkimin Evropian. Megjithatë, banka qendrore ruse mund të kërkojë të sekuestrojë asetet e Euroclear në vendet që Moska i sheh si miqësore, siç janë Kina, Emiratet e Bashkuara Arabe dhe Kazakistani.

Nga afërsisht 300 miliardë euro në asete ruse që u ngrinë jashtë vendit në vitin 2022 pasi Rusia pushtoi Ukrainën, rreth dy të tretat janë në Evropë, kryesisht të mbajtura në Euroclear.

Padia në Moskë u ngrit në dhjetor 2025, kur udhëheqësit e BE-së po shqyrtonin mundësinë e sekuestrimit të një pjese të aseteve të ngrira ruse për të financuar përpjekjet e luftës së Ukrainës.

Ata përfundimisht vendosën në vend të kësaj të merrnin hua para për t’i dhënë Kievit 90 miliardë euro, por t’i mbanin asetet e ngrira derisa Moska t’i paguante dëmshpërblimet e luftës Ukrainës – diçka që Rusia thotë se nuk do ta bëjë.

Euroclear thotë se është përputhur me ligjin e BE-së duke ngrirë asetet dhe se nuk e konsideron veten subjekt të juridiksionit të gjykatave ruse.

Nga ana tjetër, Euroclear paditi bankën qendrore ruse në një gjykatë civile belge muajin e kaluar, duke kërkuar të bllokojë zbatimin e vendimit rus kundër saj.