Gjyqtarja federale e zemëruar me administratën Trump për prerjen e 430 pemëve në fushën e golfit në Uashington

Një gjyqtare federale në Uashington shprehu të hënën zemërim të hapur ndaj administratës së presidentit Donald Trump, pasi qindra pemë u prenë gjatë fundjavës në një fushë publike golfi, ndonëse çështja ishte ende në gjyq, siç njofton USA Today.

Punonjës të Shërbimit të Parqeve Kombëtare prenë 430 pemë në fushën East Potomac Golf Links më 10 tetor, ndërsa administrata planifikon të presë rreth 300 pemë të tjera. Qeveria i njoftoi paditësit, që po përpiqeshin ta ndalonin prerjen, vetëm pasditen e 9 tetorit, pak orë para se të niste puna me makineri të rënda.

Gjatë seancës urgjente të së hënës, gjyqtarja e qarkut Ana Reyes u tha avokatëve të qeverisë se ishte thellësisht e zhgënjyer dhe i pyeti se në çfarë bote dikush mund ta quante të pranueshme këtë sjellje. Ajo e bllokoi përkohësisht çdo prerje të mëtejshme deri në orën 14:00 të 13 tetorit dhe kërkoi të dëgjojë Greg Wischer-in, zëvendësshef i kabinetit në Departamentin e Brendshëm, se si plani u finalizua brenda një jave pas shtatë vjetësh pa veprim, sipas USA Today.

Avokatja e Departamentit të Drejtësisë, Marissa Piropato, tha se avokatët e qeverisë kishin bërë më të mirën për të mbledhur detajet e prerjes. Gjyqtarja ia ktheu se nuk kishin bërë më të mirën, por më të keqen e mundshme, dhe e quajti të pabesueshme tezën se prerja nuk ishte pjesë e rinovimit më të gjerë të fushës.

Zyrtarët dëshmuan se plani u finalizua më 5 tetor dhe u miratua më 9 tetor, duke u mbështetur në një studim të vitit 2019 për rikthimin e fushës në stilin e saj origjinal “links” të viteve 1920. Rinovimi i fushës është pjesë e planeve të Trump-it për rimodelimin e kryeqytetit, ndërsa paditësit — Lidhja për Ruajtjen e Uashingtonit dhe dy lojtarë golfi — thonë se fusha publike dhe e përballueshme rrezikon të shkatërrohet në mënyrë të pakthyeshme.