Goditje ajrore ruse në Kherson: vritet shoferi 64-vjeçar i një ambulance, 19 të plagosur, mes tyre një foshnjë njëmuajshe

Guvernatori i rajonit, Oleksandr Prokudin, njoftoi të shtunën se bilanci i të plagosurve nga goditja e mëngjesit në lagjen Korabelnyi u rrit në 19, ndërsa i vrari është shoferi i urgjencës mjekësore.

Një goditje ajrore ruse ndaj qytetit jugor të Khersonit vrau të shtunën në mëngjes shoferin e një ambulance dhe plagosi 19 persona, siç njofton Reuters duke cituar guvernatorin e rajonit, Oleksandr Prokudin, i cili e dha bilancin e përditësuar në Telegram.

Sipas administratës ushtarake të qytetit, goditja me bomba të drejtuara ndaj lagjes Korabelnyi ndodhi rreth orës 04:41 të mëngjesit. I vrari është një 64-vjeçar, shofer i urgjencës mjekësore, i cili pësoi lëndime të papajtueshme me jetën, siç raporton administrata ushtarake e qytetit të Khersonit përmes kreut të saj Yaroslav Shanko.

Mes të plagosurve janë një vajzë 11-vjeçare me traumë kraniale nga shpërthimi, një familje e tërë — nënë 28-vjeçare, baba 37-vjeçar dhe foshnja e tyre vetëm një muajsh, të cilët ndodheshin në banesën e tyre në momentin e goditjes — një grua 80-vjeçare dhe një burrë 38-vjeçar. Të plagosurit u shtruan në spital, ndërsa bilanci u rrit gjatë orëve të mëngjesit nga shtatë në 19 persona.

Khersoni, i çliruar në nëntor 2022, ndodhet përballë trupave ruse përtej lumit Dnipro dhe goditet pothuajse çdo ditë me artileri, dronë dhe bomba të drejtuara, ku personeli mjekësor dhe i shpëtimit është shpesh ndër viktimat.