Greqi, sekuestrohet një sasi rekord cigaresh në portin e Pireut

Anti-kontrabanda greke ka sekuestruar një sasi rekord cigaresh në portin e Pireut. Sipas autoriteteve greke, u sekuestruan dy konteinerë me më shumë se 2.000 koli cigare të markave të ndryshme, vlera doganore e të cilave llogaritet në më shumë se 4.2 milionë euro.

Sasia e cigareve ishte tranzit në portin e Pireut dhe ishte deklaruar si ngarkesë raftesh metalike të nisura nga Kina. Konteinerët kishin destinacion Bullgarinë, por autoritetet thonë se ngarkesa do të shkarkohej në Greqi për t’u tregtuar në linjën ballkanike të kontrabandës.

Agjencia greke pohoi se nuk ka ende një të arrestuar për këtë trafik, pasi besohet se porositësi sapo e ka kuptuar se ndodhej nën vëzhgimin e autoriteteve është zhdukur në drejtim të paditur dhe është shpallur në kërkim.

Greqia vlerësohet se është një nga vendet më të rëndësishme të kontrabandës së cigareve në rajon, pas Malit të Zi. Fitimet nga ky aktivitet kriminal llogariten në më shumë se 1 miliard euro në vit. Qeveria helen është zotuar se do të shkatërrojë këtë linjën me qëllim për të rritur të ardhurat në financat e dobëta të vendit.