Gruevski: Gjithçka pranoj, por jo edhe të mos jam kryeministër

Kryeministri maqedonas, Nikolla Gruevski në një intervistë për Financial Times theksoi se është i përgatitur për t`i pranuar propozimet e opozitës për ndarjen e pozicioneve kyçe në periudhën deri në zgjedhjet e parakohshme parlamentare, por nuk pranon që të largohet nga vendi i kryeministrit, transmeton zhurnal.mk

“Me atë, kërkesën për dorëheqje, nuk pajtohemi. Vetëm qytetarët kanë të drejt që të thuan se kush duhet të futet në qeveri, e kush duhet të jetë në opozitë”, theksoi Gruevski.

Ai nuk e përjashtoi mundësinë që Komisioni Shtetëror i Zgjedhjeve të ketë më shumë kompetenca.

“Jemi të përgatitur për të pranuar më shumë ide që do ta rrisin besimin e opozitës ndaj procesit zgjedhor. I ftoj mbikëqyrësit e OSBE-së dhe nga gjithandej. Sa më shumë që vijnë, aq më mirë për ne, pasi që do të shohin se gjithçka që është bërë deri tani, ka qenë demokratike”, theksoi Gruevski.