GSJP: Përgjegjëse për emigrimin është Qeveria e Kosovës

Përgjegjëse për migrim eventual ilegal, nga 88 për qind, e njëmijë të anketuarve të analizës “Profili i migrantit kosovar: Cilët qytetarë janë më të prirë të migrojnë në vendet e BE-së”, shihet të jetë Qeveria e Kosovës.

Sipas analizës së hartuar nga Grupi për Studime Juridike dhe Politike (GSJP), që është publikuar të hënën, arsyet se pse qytetarët e Kosovës do të migronin janë humbja e shpresës se situata socio-ekonomike dhe politike do të përmirësohet, kërkimi i një jetë më të mirë dhe situata e rëndë ekonomike, raporton Koha.net.

Rezultatet e analizës empirike, që është bazuar në intervistimin e një mijë personave gjatë muajit mars të këtij viti, tregojnë se shumica e individëve të gatshme për të migruar i takojnë grupmoshave të reja.

45 për qind e individëve që i takojnë grupmoshës 18-25 vjet dhe asaj 25-34, janë shprehur të gatshëm për të migruar.

Në bazë të kësaj analize, GSJP-ja ka nxjerr edhe disa rekomandime. Njëra nga to është që Qeveria e Kosovës duhet të ketë një qasje proaktive në negocimin dhe nënshkrimin e marrëveshjeve për punësim sezonal me vendet e BE-së, ShBA-së, Kanadanë dhe Australinë.