Guvernatori Sejko do të prezantojë raportin e BSH-së për vitin 2015

Guvernatori i Bankës se Shqipërisë,Gent Sejko do të prezantojë të martën në Komisionin e Ekonomisë dhe Financave, Raportin Vjetor të Bankës Qendrore për vitin 2015, bën të ditur në një njoftim për shtyp, BSH-ja.

Guvernatori Sejko po paraqesë drejtimet kryesore të punës gjatë vitit të kaluar, përfshirë politikën monetare, stabilitetin financiar, si dhe një përmbledhje të gjendjes ekonomiko-financiare të vendit.

Në kete prezantim të raportit, Guvernatori i Bankës së Shqipërisë pritet të parashtrojë sfidat me të cilat po përballet ekonomia shqiptare, drejtimet kryesore të politikës monetare në vijim, një opinion mbi zhvillimet në ekonominë botërore dhe ndikimin e saj në ekonominë shqiptare.

Pak ditë më parë në konferencën e përbashkët për shtyp, me Misionin e FMN-së dhe Ministrin e Financave, Guvernatori Sejko, deklaroi se, ekonomia shqiptare vazhdon të mbetet në një trajektore pozitive zhvillimi. Rritja ekonomike u përshpejtua më tej gjatë vitit 2015, mbështetur nga zgjerimi i investimeve dhe nga përmirësimi i bilancit të shkëmbimeve tregtare me partnerët e huaj. Ndërsa konsumi privat shfaqi shenja gjallërimi në gjysmën e dytë të vitit, dhe konsumi publik vazhdoi të mbetet i kufizuar, në përputhje me strategjinë e konsolidimit fiskal.